Os dous albariños da adega de Rías Baixas Mar de Envero, Troupe e Mar de Envero elaborado sobre lías, foron premiados con senllas medallas na Catavinum World Wine & Spirit Competition 2016.Nesta competición, a Medalla de Ouro concedida ao albariño Mar de Envero elaborado sobre lías premia a un viño moi intenso e moi complexo en aromas, con corpo alto e ben equilibrado e moi persistente.
Pola súa banda, a Medalla de Prata lograda polo albariño monovarietal Troupe premia a un viño intenso e complexo en aromas, con corpo medio-alto, ben equilibrado e con boa persistencia final.
O concurso Catavinum World Wine & Spirits Competition (CWWSC), organizado e desenvolvido por Catavinum, ten entre os seus principais obxectivos o de informar a consumidores e profesionais sobre a calidade dos viños e licores premiados, co fin de contribuír á súa difusión e, ademais, potenciar a produción e elaboración de produtos de calidade. Para a realización da edición 2016 do certame catáronse un total de 3156 viños e licores procedentes de máis de 28 países, dos cales 937 obtiveron diploma e medalla.
